Бунёди Шамс осори мавлавишиносонро нашр менамояд

Душанбе, 26 апрел.(АМИТ «Ховар», Марзия Саидова).- Сеюмин нишаст аз силсиланишастҳои Бунёди Шамси Табрезӣ бо ҳамкории Муассисаи фарҳангии Созмони Ҳамкориҳои Иқтисодӣ (CҲИ) дар Теҳрон баргузор гардид. Шоҳмансури Шоҳмирзо, намояндаи Тоҷикистон дар СҲИ ба АМИТ «Ховар» иттилоъ дод, ки дар нишаст мавлоношиноси машҳури эронӣ Тавфиқи Субҳонӣ дар мавзӯи «Бурҳониддини Муҳаққиқи Тирмизӣ:мураббии Мавлоно» суханронӣ намуд. Вай дар бораи сирати маънавии Бурҳониддини Муҳаққиқи Тирмизӣ ва ҷойгоҳи ӯ дар шаклгирии шахсияти Мавлоно ишора намуда, ахбори тазкира ва таърихномаҳо, инчунин ишораҳои Мавлоноро дар «Девони Кабир» ва «Маснавии маънавӣ» дар бораи ин чеҳраи саршинос зикр намуд. Бурҳониддини Муҳаққиқи Тирмизӣ дӯст ва муриди Баҳоуддин,падари Мавлоно Ҷалолуддин буд, ки тибқи васияти ӯ пас аз даргузашташ тарбияти маънавӣ ва ҳидояти рӯҳонии Мавлоноро бар ӯҳда гирифт. Гуфтанист Бунёди Шамси Табрезӣ ҳар моҳ нишастеро бо ширкати аҳли адабу фарҳанг ва намояндаҳои ройзаниҳои фарҳангии муқими Теҳрон дар Дафтари омӯзишии Муассисаи фарҳангии СҲИ Теҳрон барпо менамояд. Суханрониҳое, ки дар нишаст садо медиҳанд, дар шакли лавҳи фишурда(СД) дар ихтиёри муштоқони каломи форсӣ қарор мегиранд.Доктор Ҳуҷҷатуллоҳи Аюбӣ, раиси Муассисаи фарҳангии СҲИ мегӯяд: дарҳои Бунёди Шамси Табрезӣ бар рӯи ҳамаи пажуҳишгарони осори Мавлоно дар тамоми ҷаҳон, аз ҷумла Тоҷикистон боз аст. Ҳар касе дар ин замина пешниҳоди созандае дорад, онро ба мо баён намояд ва ё дар риштаи мавлоношиносӣ таҳқиқ ва пажӯҳиши тозае дорад, Бунёди Шамс омода аст онро чоп намояд.