Бурду бохти фаъолияти семоҳа

Хоруғ, 16 апрел. (АМИТ «Ховар», Л.Додо ). – Раёсати тандурустии ВМКБ аз фаъолияти семоҳааш ҳисобот дод. Тавре сардори Раёсати тандурустии вилоят Саидбек Давлатбеков ба хабарнигори АМИТ «Ховар» иттилоъ дод, ҳоло дар ҳудуди вилоят 229 муассисаи кӯмаки аввалияи тиббию санитарӣ фаолият дорад, ки 163 тоаш бунгоҳҳои тиббӣ мебошанд. Ҳамчунин 2 таваллудхонаи минтақавӣ, 35 маркази саломатии деҳот ва 17 беморхонаи минтақавӣ ба муолиҷаи ниёзмандон машғуланд.Соли ҷорӣ дар шаҳри Хоруғ биноҳои нави бемории сил, корхонаи дорусозӣ ва дар навоҳӣ бунгоҳу марказҳои саломатӣ мавриди истифода қарор мегиранд. Ҳоло дар вилоят 47 нафар духтурони тибби оилавӣ ва 142 нафар ҳамшираҳои тибби оилавӣ фаъолият доранд. Бори нахуст беморхонаҳои ҷамоати деҳоти Сипонҷ ва Басиди ноҳияи Рӯшон тариқи таҷрибавӣ ба маркази хидматрасонии тибби оилавӣ табдил дода шудаанд.Саидбек Давлатбеков аз вазъи ҷилавгирии фавти модару кӯдак дар ноҳияҳои Ишкошим, Роштқалъа ва Мурғоб изҳори нигаронӣ карда, қайд намуд, ки барои сари вақт таъмин кардани беморон бо доруи зарурӣ ва муолиҷаи хушсифати онҳо тадбирҳо андешида мешаванд.