“Челси” “Барселона”-ро ноком кард

Душанбе, 25 апрел. ( АМИТ «Ховар», Аловиддин Бӯриев).- Дар дидори баргашти бозиҳои нимниҳоии Ҷоми чемпионҳои Аврупо клуби футболи “Челси” ҳарифи қудратманди худ “Барселона”-и Испанияро аз идомаи бозиҳо барканор кард. Дар варзишгоҳи “Камп Ноу” футболбозони англис тавонистанд бартарии як голи дар бозии рафт задаашонро то ба охир нигоҳ дошта, бо натиҷаи 2 бар 2 бозиро мусовӣ анҷом диҳанд. Дар давоми бозӣ баъди аз майдон ронда шудани Ҷон Терри дар дақиқаи 37-ум маҳорати касбии футболбозони “Челси” имкон надод, ки католониҳо ба мақсад расанд. Лионел Мессӣ ҳам ҷазои 11 метраро хато зад ва он ба тири дарвоза бархӯрд. Ҳамин тавр, голҳои Серхио Бускетс дар дақиқаи 35 ва Андрес Инйеста дар дақиқаи 43 ба голҳои задаи Рамирес ва Фернандо Торрес ҳаммаъно набуданд. Акнун “Челси” ҳарифи худро дар финал баъди бозии дуввуми нимниҳоӣ байни тимҳои “Реал” ва “Бавария”(1:2) , ки имрӯз барпо мегардад, пайдо хоҳад кард.