Дар Кӯлоб бақияпулии андоз зиёд мегардад

Кӯлоб, 7 апрел. (АМИТ «Ховар», С.Холов). – Дар шаҳри Кӯлоб ҷамъоварии андоз моҳ ба моҳ мушкил гардида, боиси иҷро нагардидани нақшаи андоз мегардад. Бино ба иттилои сардори нозироти андози шаҳри Кӯлоб Фарҳод Қурбонов қарзи андоз аз тарафи ташкилоту муассисаҳо дар се моҳи соли ҷорӣ ба 9 миллиону 300 ҳазор сомонӣ расидааст, ки ин нисбат ба ҳамин давраи соли гузашта 1 миллиону 300 ҳазор сомонӣ зиёд мебошад. Ба гуфтаи манбаъ Корхонаи обу ташноб, Идораи давлатии хоҷагии об, Ҷамъияти матлубот, хоҷагии деҳқонии «Обиди Сироҷ», хоҷагии деҳқонии «Сафар» ва дигар ташкилоти бонуфуз аз андоз қарздор буда, масъулин дар пардохти он хунукназарона рафтор менамоянд. Аз тарафи нозироти андоз барои сари вақт пардохт накардани андоз нисбат ба Ҷамъияти матлубот қарор дар бораи ҳабси амвол тартиб дода шудааст.