Дарахтони шаҳр инвентаризатсия мешаванд

Душанбе, 3 апрел.(АМИТ «Ховар», Марзия Саидова).-То 1 майи соли равон тамоми дарахтони дар шафати кӯчаю хиёбонҳои пойтахт буда, муоина ва инвентаризатсия мешаванд. Дар робита ба ин масъала Маҳмадсаид Убайдуллоев, раиси шаҳри Душанбе дар ҷаласаи шаҳрдорӣ ба масъулини Кумитаи ҳифзи табиати шаҳри Душанбе супориш дод, ки зимни муоина ва инвентаризатсияи дарахтони пойтахт тибқи тартиби муқарраргардида аз байн бурдани дарахтони кӯҳнаву ноустуворро, ки ба амнияти шаҳрвандон таҳдид мекунанд, таъмин намоянд. Ин тадбири шаҳрдорӣ дар ҳоле андешида мешавад, ки дар зимистони тӯлонии соли равон бар асари боридани барф ва сардии зиёд бархе аз дарахтони куҳан фурӯ афтода, боиси ҷароҳат ва марги баъзе шаҳрвандон гардид.