Дарсҳои махсуси масъулини дин

Душанбе, 12 апрел.(АМИТ «Ховар», Дилшодаи Хайруллоҳ).- Кумитаи оид ба корҳои дини назди Ҳукумати Ҷумҳурии Тоҷикистон ба хотири баланд бардоштани савияи дониши сиёсии кормандони Кумита ва тақвияти рӯҳияи ватандӯстӣ, миллатдӯстӣ, посдории арзишҳои миллӣ дарсҳои махсусро ба роҳ мондааст. Ибтидо аз соли нав ҳар моҳ ду маротиба чунин дарсҳо бо ширкати олимону сиёсатмадорони кишварамон гузаронида мешаванд. Дар дарсҳо мутахассисон аз ҳисоби дастгоҳи иҷроияи Президенти Ҷумҳурии Тоҷикистон, Академияи илмҳои ҷумҳурӣ, мақомоти ҳифзи ҳуқуқ ва дигар ниҳодҳои кишвар даъват карда мешаванд. Мавриди зикр аст, ки дирӯз дар Кумитаи оид ба корҳои дини назди Ҳукумати Ҷумҳурии Тоҷикистон дарси навбатӣ дар мавзӯи “Худшиносии миллӣ ва шуури таърихӣ» гузаронида шуд ва дар он олим ва сиёсатмадор Кароматулло Олимов ҳузур дошт.