Дидори Қодири Қосим аз Ишкошим

Хоруғ, 24 апрел. (АМИТ «Ховар», Л.Додо ). – Раиси Вилояти Мухтори Кӯҳистони Бадахшон Қодири Қосим аз ноҳияи Ишкошим дидан намуд.Ин боздиди корӣ бо дастури Сарвари давлат Эмомалӣ Раҳмон ба манзури расонидани кӯмак ба шахсони аз офатҳои табиӣ зарардидаи мавзеъҳои дурдасти вилоят сурат гирифт.Раиси вилоят ва ҳамсафаронаш бо сокинони ҷамоати деҳоти Вранг, ки манзилҳояшон бар асари офатҳои табиӣ осеб дидаанд, сӯҳбат намуда, тасмим гирифтанд, ки барои ҳар оилаи аз офати табиӣ осебдида ба маблағи аз 1 ҳазору 100 сомонӣ то 2,5 ҳазор сомонӣ кӯмак расонида шавад. Ҳамчунин қарор дода шуд, ки 16 хонаводаи аз офатҳои табиӣ зарардидаи деҳаи Вранг ба ҷойҳои бехатар кӯчонида шаванд. Ҳоло бо кӯмаки сокинони маҳаллӣ ва Раёсати мелиоратсия ва захираҳои оби вилоят барои барқарор намудани каналу ҷӯйборҳои аз офати табиӣ зарардида корҳои барқарорсозӣ идома доранд.