Фаъолияти мутахассисони тоҷик дар Кобул

Душанбе, 11 апрел. (АМИТ «Ховар», Лутфия Эшонқулова). – Дар шаҳри Кобул тренинги чоррӯза барои 18 нафар кормандони хадамоти назорати маводи нашъаовари Афғонистон ҷиҳати истифодаи барномаи махсус ҳангоми таҳлили гуфтугӯи телефонӣ анҷом ёфт. Ин тадбир бо ибтикори кормандони Агентии назорати маводи нашъаовари назди Президенти ҶТ ва бо дастгирии мустақими ташкилию молиявии намояндагиҳои СММ дар шаҳрҳои Душанбе ва Кобул сурат гирифт. Мувофиқи хабари маркази матбуоти Агентии назорати маводи нашъаовари кишвар, дар кори тренинг муовини вазири корҳои дохилии Ҷумҳурии Исломии Афғонистон Бозмуҳаммад Аҳмадӣ ширкат дошт.Кормандони хадамоти назорати маводи нашъаовари Афғонистон дар ҷараёни тренинг хоҳиш намуданд, ки минбаъд на фақат дар шаҳри Кобул балки дар шаҳри Душанбе низ чунин курсу семинарҳои таълимӣ доир карда шаванд.