Фолклори диёри шоир

Душанбе, 3 апрел. (АМИТ «Ховар», Ҳотам Рабиев).- «Фарҳанги мардуми диёри Турсунзода»- чунин ном дорад китобе, ки дастраси хонандагон гардид. Китобро олимони Пажӯҳишгоҳи забон, адабиёт, шарқшиносӣ ва мероси хаттии ба номи Рӯдакии Академияи илмҳои Ҷумҳурии Тоҷикистон Рӯзии Аҳмад ва Дилшод Раҳимов гирдоварӣ ва тадвин намудаанд. Китоби мазкур намунаҳои фолклор ва фарҳанги суннатии мардуми закитабъи ноҳияҳои Шаҳринаву Турсунзодаро дар бар гирифта, дар он бори нахуст матнҳои гирдовардаи фолклоршиносони тоҷик дарҷ шудаанд. Махсусан намунаҳои рубоиву суруд, зарбулмасалу мақол, нақлу ривоятҳо ва тасвири ҷашну маросимҳои ин диёр ҷолибу судманд ва пур аз панду ҳикмат буда, барои хонандагон маълумоти тозаи бадеӣ ва таърихӣ медиҳанд. Китоб бо кӯмаки моддии раиси Ширкати «Вавилон-Мобайл» Беҳрӯз Файзуллоев нашр гардидааст.