Гурӯҳи корӣ истифодаи самараноки нерӯи барқро меомӯзад
Душанбе, 9 апрел. (АМИТ «Ховар», Дилшодаи Хайруллоҳ).- Ҳафтаи сипаришуда бо супориши вазири энергетика ва саноати Ҷумҳурии Тоҷикистон Гул Шералӣ аз ҳисоби кормандони Вазорати энергетика ва саноати Ҷумҳурии Тоҷикистон гурӯҳҳои корӣ таъсис ёфта, ба минтақаҳои гуногуни ҷумҳурӣ сафарбар шуданд. Мавриди тазаккур аст, ки ба вилоятҳои Хатлону Суғд, ноҳияҳои тобеи ҷумҳурӣ ва шаҳри Душанбе дар маҷмӯъ 14 гурӯҳи корӣ сафарбар шуда, дар шаҳру ноҳияҳо онҳоро намояндагони мақомоти маҳаллии ҳокимияти давлатӣ ҳамроҳӣ намуданд. Дар як қисми минтақаҳо, аз ҷумла вилояти Хатлон, дар якҷоягӣ бо мақомоти маҳаллии вилоятиву шаҳрӣ бо соҳибмулкон ва роҳбарони корхонаҳо ҷаласаҳои корӣ доир карда шуд. Мақсади сафар боздид аз корхонаҳои истеҳсолӣ, новобоста аз шакли моликият ҷиҳати истифодаи самараноки нерӯи барқ, ташкили фаъолияти корхонаҳо дар ду-се баст буда, дар айни замон бинобар фароҳам омадани имконияти таъмини тамоми ҷумҳурӣ бо нерӯи барқ ҷиҳати истифодаи самараноки нерӯи барқ дар корхонаҳо чораҳои зарурӣ андешида мешаванд. Вобаста ба ин аз ҷониби вазири энергетика ва саноати Ҷумҳурии Тоҷикистон ба пайгирии мунтазам ва доимии масъалаҳои мазкур, ҳамчунин таҳлилу баррасӣ, пешниҳоди ҳисобот ва андешидани тадбирҳо дар соҳаҳои вазорат ва корхонаҳои воҳиди давлатӣ таъкид карда шудааст.