Имзои санадҳо дар Вазорати энергетика ва саноат

Душанбе, 23 апрел. (АМИТ «Ховар», Дилшодаи Хайруллоҳ). — Дар Вазорати энергетика ва саноати Ҷумҳурии Тоҷикистон вохӯрии вазири энергетика ва саноати Ҷумҳурии Тоҷикистон Гул Шералӣ бо ҳайати Вазорати илм ва техникаи Ҷумҳурии Мардумии Чин, ширкати «Beijing Jinchuang Combined Gas Meter Co.,Ltd»-и ин кишвар бо сардории профессор Жэн Сянкун баргузор гардид. Бояд қайд намуд, ки ҳайати мутахассисони чинӣ иборат аз 8 нафар олиму коршинос бо даъвати Вазорати энергетика ва саноати Ҷумҳурии Тоҷикистон ва мусоидати Вазорати корҳои хориҷии Ҷумҳурии Тоҷикистон ба кишварамон ташриф оварданд. Дар вохӯрӣ ҷонибҳо масъалаҳои ба истифодаи ангишт гузаронидани ҶСК «Тоҷиксемент», аз ангишт истеҳсол кардани гази табиӣ барои таъминоти аҳолӣ, имконияти ҳамкориҳо дар масъалаи корҳои ҷустуҷӯию геологӣ дар соҳаи нафту газро мавриди баррасӣ қарор доданд. Мутахассисони чинӣ баъди боздид аз ҶСК «Тоҷиксемент» омӯзиши хатҳои технологии он ва гирифтани маълумоти зарурӣ асосноккунии техникию иқтисодиро доир ба масъалаи ба истифодаи ангишт гузаштани корхона таҳия ва пешниҳод хоҳанд намуд. Пас аз вохӯрӣ ва гуфтушунидҳо Ёддошти тафоҳум дар мавриди ҳамкориҳо миёни Вазорати энергетика ва саноати Ҷумҳурии Тоҷикистон ва ширкати « Beijing Jinchuang Combined Gas Meter Co.,Ltd» Ҷумҳурии Мардумии Чин дар соҳаи истифодаи маҷмӯавии ангишт ва ҳамкориҳо дар соҳаи нафту газ, ҳамчунин Протоколи ҳамкорӣ байни ҶСК «Тоҷиксемент» ва ширкати « Beijing Jinchuang Combined Gas Meter Co.,Ltd» ба имзо расид.Дар ин бора ба мухбири АМИТ «Ховар» аз котиботи Вазорати энергетика ва саноати ҶТ иттилоъ доданд.