Интихобот дар ҳавзаи Душанбе

Душанбе, 4 апрел.(АМИТ «Ховар», Марзия Саидова).-9 июни соли 2012 дар ҳавзаи интихоботии №4 шаҳри Душанбе интихоботи аъзои Маҷлиси миллии Маҷлиси Олии Ҷумҳурии Тоҷикистон ба ҷои аъзои хориҷшуда гузаронида мешавад. Дар робита ба ин 4 апрел дар ҷаласаи комиссияи марказии интихобот ва раъйпурсии /КМИР/ Ҷумҳурии Тоҷикистон, ки таҳти раёсати Шермуҳаммади Шоҳиён, Раиси КМИР баргузор шуд, қарори марбута қабул гардид. Зикр шуд, ки дар иҷлосияи ҳаштуми палатаи болоии парлумони мамлакат, ки 29 марти соли равон баргузор гардид, ваколати узви Маҷлиси миллӣ аз ҳавзаи интихоботии Душанбе №4 Нуриддин Саидов бо сабаби ба кори дигар гузаштан қатъ гардид. Бинобар ин тибқи талаботи моддаи 57 Қонуни Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» дар сурати пеш аз мӯҳлат қатъ гардидани ваколати аъзои Маҷлиси миллӣ интихоботи нав дар муддати се моҳ баъди қатъ гардидани ваколати онҳо гузаронида мешавад. Ҳамзамон дар ҷаласа нақшаи тақвимии чорабиниҳои асосӣ доир ба тайёрӣ ва гузаронидани интихоботи аъзои Маҷлиси миллии Маҷлиси Олии Ҷумҳурии Тоҷикистон ба ивази аъзои хориҷшуда дар ҳавзаи интихоботии Душанбе №4 тасдиқ гардид. Шермуҳаммади Шоҳиён, Раиси КМИР ба Абдуманнон Додоев, роҳбари дастгоҳи КМИР супориш дод, ки иҷрои саривақтии ҳар як банди Нақшаи тақвимии чорабиниҳои асосиро зери назорат қарор диҳад. «Тамоми кӯшиши масъулин ба он равона карда шавад, ки интихоботи аъзои Маҷлиси миллии Маҷлиси Олии Ҷумҳурии Тоҷикистон муташаккилона, озод ва шаффофу демократӣ баргузор гардад», -таъкид кард дар фарҷоми ҷаласа Шоҳиён.