Истеҳсоли маҳсулоти шишагӣ афзуд
Душанбе, 2 апрел. (АМИТ «Ховар», Дилшодаи Хайруллоҳ).- ҶДММ «Корхонаи нонпазию қаннодӣ»-и шаҳри Қайроққум ба Ҷумҳурии Тоҷикистон барои корхонаи нав хатти технологии истеҳсоли шиша ва зарфҳои шишагӣ ворид намуд. Моҳи марти соли 2011 бо иштироки Президенти Ҷумҳурии Тоҷикистон Эмомалӣ Раҳмон корхона кушоиш ёфт ва ба фаъолият оғоз намуд. Иқтидори солонаи корхона 1,3 миллион метри мураббаъ шишаи сохтмонӣ ва истеҳсоли 25 миллион дона зарфи шишагиро ташкил медиҳад. Дар корхона 150 нафар коргар бо ҷойи кори доимӣ таъмин гардида, соли 2011-ум 225,6 ҳазор метри мураббаъ ба маблағи 4,4 миллион сомонӣ ва дар ду моҳи соли 2012 (январ-феврал) 35 ҳазор метри мураббаъ ба маблағи 665,4 ҳазор сомонӣ шишаи сохтмонӣ истеҳсол гардид. Дар айни замон хатти технологии истеҳсоли бонкаҳои 1 ва 2 литра пурра насб шуда, 10 ҳазор дона бонка ба таври озмоишӣ истеҳсол шудааст. Барои зиёд кардани ҳаҷми истеҳсоли бонка аз Ҷумҳурии Мардумии Чин як хумдони дигар харид шудааст, ки рўзҳои наздик ба ҷумҳурӣ ворид ва насб мегардад. Мавриди қайд аст, ки корхона аллакай бо соҳибкорони ватанӣ барои 3,5 миллион дона бонка шартнома бастааст, ки як қисми маблағи он пешпардохт шудааст.