Истеҳсоли зарфҳои шишагӣ дар Суғд

Суғд, 21 апрел. (АМИТ «Ховар», М.Амонов). – Аз ҷониби Ҷамъияти масъулияташ маҳдуди «Бародарони саховатманд» дар ҳамкорӣ бо мутахассисони Ҷумҳурии Мардумии Чин дар шаҳри Қайроққум хати нави технологии истеҳсоли зарфҳои шишагӣ васлу насб гардид. Хати нави технологӣ аз озмоиш муваффақона гузашт ва ҳоло дар ин таҷҳизоти муосир чанд намуди зарфҳои шишагӣ истеҳсол мешавад. Истифодаи сӯзишвории алтернативӣ (ангишт) аз афзалиятҳои ин хату таҷҳизоти технологии корхонаи тозатаъсис мебошад.Корхонаи нав иқтидор дорад дар як шабонарӯз 20 ҳазор дона, дар як моҳ то 600 ҳазор дона зарфи шишагии аз 500 грамма то 2 литраро истеҳсол намояд. Ба роҳ мондани истеҳсоли зарфҳои шишагӣ дар дохили кишвар барои таъмини корхонаҳои коркарди маҳсулоти кишоварзӣ ва коргоҳҳои истеҳсолкунандаи оби нӯшокӣ аҳамияти муҳим дорад.