Истиқболи Искандар

Кӯлоб, 12 апрел. (АМИТ «Ховар», С.Холов).–Чанде пеш раиси шаҳри Кӯлоб Абдуғаффор Раҳмонов як гурӯҳ варзишгарон ва мураббиёнро ба ҳузур пазируфт. Раиси шаҳр аз дастоварди Искандари Рустам- чемпиони мусобиқаи интихобии Осиё дар шаҳри Остонаи Қазоқистон, ки соҳиби роҳхат ба Бозиҳои тобистонаи олимпии Лондон – 2012 гардид, изҳори хушнудӣ намуда, гуфт: ин муваффақияти на танҳо Искандар, балки тамоми мардуми тоҷик мебошад.Аз ҳисоби буҷаи шаҳр ба Искандари Рустам тӯҳфаҳои пулию молӣ тақдим гардида, раиси шаҳр ба раёсати ҷавонон, варзиш ва сайёҳии шаҳр супориш дод, ки дар донишгоҳу мактабҳои варзишӣ ва таҳсилоти ҳамагонӣ вохӯрии паҳлавонро бо ҷавонон доир намоянд, инчунин баҳри тарғиби варзиш дар байни ҷавонон тақвиму овезаҳо бо акси Искандари Рустам омода ва дар кӯчаҳои марказии шаҳр насб шаванд. Акнун Искандари Рустам барои иштироки муваффақона дар Бозиҳои тобистонаи олимпии Лондон – 2012 омодагӣ мегирад.