Корхонаи семент дар Мастчоҳ

Душанбе, 2 апрел. (АМИТ «Ховар», Дилшодаи Хайруллоҳ).- Бо мақсади татбиқи «Барномаи рушди масолеҳи сохтмонӣ дар давраи то соли 2015» бунёди корхонаҳои нав, таъсиси ҷойҳои нави корӣ, ба роҳ мондани намудҳои нави масолеҳ идома дорад. Бо дастгирӣ ва мусоидати Вазорати энергетика ва саноати Ҷумҳурии Тоҷикистон дар ноҳияи Мастчоҳ аз ҷониби ҶДММ «Суғд семент» сохтмон ва насби таҷҳизоти навбати аввали корхонаи семент (бо иқтидори солонаи 100 ҳазор тонна семент) давом дорад. Корҳои сохтмонӣ ба итмом расида, иҷрои васлу насби таҷҳизот 90 %-ро ташкил медиҳад. Ҳоло дар корхона 2 мутахассиси чиноӣ ва 110 нафар коргари маҳаллӣ дар ду баст ба корҳои насбу озмоиш ва компютеркунии таҷҳизот машғуланд. Ифтитоҳи расмии корхона охири моҳи апрел пешбинӣ гардидааст. Дар ин корхона бунёди 152 ҷойи нави корӣ дар назар дошта мешавад.