Майдонҳои сунъӣ дар Тоҷикистон
Душанбе, 23 апрел. ( АМИТ «Ховар», Аловиддин Бӯриев).- Федератсияи байналмилалии футбол дар шаҳри Душанбе ва дар дараи Алмосӣ майдонҳои сунъии футболро бунёд мекунад. Дар ин бора дар конфронси матбуотие, ки дар Федератсияи футболи мамлакат баргузор гардид, намояндаи ин ташкилот Давид Боря иттилоъ дод. Ду майдони сунъие, ки дар Тоҷикистон сохта мешавад, ба барномаи «ГОЛ-2» мансуб буда, ҳамчун кӯмаки техникӣ ба ФФТ маънидод мешавад. Аз рӯи ин барнома Тоҷикистон ҳар сол барои равнақи футбол 250 000 доллар қӯмак мегирад ва инчунин дар доираи ин кӯмак сохтани майдонҳои футбол ҳам дар назар аст. «Аз сабаби он, ки арзиши майдонҳо боло рафтаанд, –гуфт Девид Боря, — ФИФА ҳам кӯмаки техникиро барои сохтани ҳар як майдон то 500 000 доллар боло бурд». Сохтмони майдонҳоро дар Тоҷикистон ширкати ҳоландии «Грин Филд» то моҳи октябр ба итмом мерасонад. Бино ба хабари намояндаи ин созмон Валерий Чухрий, ФИФА дар Норак гузаронидани мусобиқаи байналмилалии кӯдакони то 11 соларо бо ширкати дастаҳои мунтахаби кишварҳои ҳамсоя ба нақша гирифтааст.