Маликшо Неъматов: «Аз Искандари Рустам медали тиллоиро интизорем»
Душанбе, 3 апрел. (АМИТ «Ховар», Дилшодаи Хайруллоҳ).- Бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар толори дастгоҳи марказии Кумита ба ифтихори Искандари Рустам барои роҳхат гирифтан ба Бозиҳои олимпии Лондон-2012 ва Мавзуна Чориева барои соҳиб шудан ба медали нуқра дар чемпионати Осиё чорабинии тантанавӣ сурат гирифт. Дар чорабинӣ Раиси Кумита Маликшо Неъматов иштирок ва суханронӣ намуда, аз номи Президенти кишвар ва ҳамзамон Президенти Кумитаи миллии олимпӣ Эмомалӣ Раҳмон ба Искандари Рустам 5000 (панҷ ҳазор) сомонӣ ва ба Мавзуна Чориева 2500 (дуюним ҳазор) сомонӣ тақдим намуд. Неъматов таъкид намуд: мо аз иштироки Искандари Рустам дар Бозиҳои Олимпии Лондон-2012 медали тилло ва аз Мавзуна гирифтани роҳхат ба олимпиадаро интизорем. Дар ин бора ба мухбири АМИТ «Ховар» аз бахши иттилоотию таҳлилии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд.