Мулоқоти М. Неъматов бо Шайх Аҳмад Ал- Фаҳад Ал- Сабоҳ

Душанбе, 18 апрел. (АМИТ «Ховар», Дилшодаи Хайруллоҳ).- 17 апрели соли 2012 дар шаҳри Маскави Федератсияи Русия Ассамблеяи Генералии Ассотсиатсияҳои Кумитаҳои олимпӣ (ANOS) ва форуми дуюми ҷаҳонии варзиши олимпӣ баргузор гардид. Дар кори он раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон –ноиби аввали Кумитаи миллии олимпӣ Маликшо Неъматов иштирок намуд. Дар баробари масъалаи вобаста ба рушди ҳаракати олимпӣ ҳамоҳангсозии фаъолияти сохтори давлатии варзишӣ ва кумитаҳои олимпӣ, федератсияҳои варзишӣ, инчунин интихоботи Президенти Ассотсиатсияи кумитаҳои олимпӣ баргузор гардид. Дар натиҷа бо дастгирии 204 кишвари иштирокчӣ раиси Шӯрои олимпии Осиё Шайх Аҳмад Ал- Фаҳад Ал- Сабоҳ Президенти Ассотсиатсияи Кумитаҳои миллии олимпӣ интихоб гардид. Маликшо Неъматов дар мулоқоти Шайх Аҳмад Ал- Фаҳад Ал- Сабоҳро барои ба вазифаи сатҳи баланд интихоб шуданаш аз номи Президенти Кумитаи миллии олимпиии Ҷумҳуриии Тоҷикистон Эмомалӣ Раҳмон табрик гуфт. Шайх Аҳмад Ал- Фаҳад Ал- Сабоҳ дар навбати худ изҳори миннатдорӣ карда, омодагии пурраи худро барои рушди ҳаракати олимпӣ дар Ҷумҳурии Тоҷикистон иброз намуд.Ёдовар мешавем, ки миёни Кумитаи миллии олимпии Тоҷикистон ва Шӯрои олимпии Осиё, ки роҳбариашро Шайх Аҳмад Ал- Фаҳад Ал- Сабоҳ ба ӯҳда дорад, ҳамкориҳои мутақобилан судманд ба роҳ монда шудаанд.