Мушкилоти мардум осон мегардад

Душанбе, 27 апрел. (АМИТ «Ховар», Ҳотам Рабиев).- Лоиҳаи «Рушди деҳот» аз моҳи сентябри соли 2007 ба фаъолият оғоз намуд. Мақсади асосии лоиҳа дастгирии соҳаи кишоварзӣ, афзун намудани маҳсулоти кишоварзӣ, тақвияти инфрасохтори маҳал ва дар ин замина беҳтар намудани сатҳи зиндагии аҳолии деҳот мебошад. Лоиҳаи «Рушди деҳот» дар пешбурди сиёсати аграрии ҳукумати Ҷумҳурии Тоҷикистон мусоидат намуда, дар ривоҷи соҳибкорӣ ва беҳтар намудани ҳолати муҳити зист ҳиссагузор аст.Ба наздикӣ зерлоиҳаи «Сохтмони хатти оби нӯшокӣ»-и деҳаи Тахти Алиф дар ҷамоати Чашмасори ноҳияи Файзобод мавриди истифодаи аҳолӣ қарор гирифт. Баробари ба истифода додани хатти оби нӯшокӣ зиёда аз 1300 нафар бо оби тозаи нӯшокӣ таъмин шуданд. Канали байнихоҷагии деҳаи Навободи ҷамоати ба номи Абдулвосиеви ноҳияи Ваҳдат барқарор карда шуд, ки аз оби ин канал зиёда аз 120 хоҷагии деҳқонӣ фаъолияти пурсамар доранд. Барқарор ва мустаҳкам намудани кулли роҳҳои мошингузар дар километри 4-уми роҳи Чорбоғ, Чормағзакони ноҳияи Варзоб ба анҷом расид.