Мусодираи маводи нашъаовар

Душанбе, 19 апрел. (АМИТ «Ховар», Лутфия Эшонқулова). – Мақомоти ҳифзи ҳуқуқи Тоҷикистон бар асари се амалиёт дар ҳудуди ҷумҳурӣ қариб 4 килограмм маводи нашъаоварро мусодира намуданд. Назар ба хабари Маркази матбуоти Вазорати корҳои дохилии ҶТ, кормандони милиса дар ноҳияи Исмоили Сомонии пойтахт аз сокини 44 – солаи ноҳияи Варзоб беш аз 3 килограмм афюнро мусодира карданд.18 апрел дар ҳудуди ноҳияи Ҷаббор Расулов аз сокини 31 — солаи ҷамоати Янгиҳаёти ноҳияи мазкур қариб 600 грамм афюн мусодира гардид. Худи ҳамон рӯз сокини 35 – солаи пойтахти кишвар дастгир шуда ва аз ӯ 107 грамм маводи нашъаовар мусодира гардид. Аз рӯи ҳамаи ин ҳодисаҳо парвандаҳои ҷиноӣ кушода, тафтишот идома дорад.