Нақши ҷавонони эҷодкор дар ҷомеа

Душанбе, 12 апрел. (АМИТ «Ховар», Дилшодаи Хайруллоҳ).- 11 апрели соли ҷорӣ дар Донишгоҳи техникии Тоҷикистон ба номи М.Осимӣ бо ибтикори Намояндагии Ташкилоти ҷамъиятии ҷавонон «Созандагони Ватан» дар шаҳри Душанбе бахшида ба 20-умин солгарди Иҷлосияи XVI Шӯрои Олии Ҷумҳурии Тоҷикистон конфронси илмию назарӣ таҳти унвони «Нақши ҷавонони эҷодкор дар ҷомеа» баргузор гардид. Дар конфронс 340 нафар ҷавони фаъолу эҷодкор аз тамоми макотиби олии пойтахт ширкат варзиданд. Дар толор намоишгоҳи дастовардҳои эҷодӣ ва ихтирооти ҷавонон ташкил шуд, ки иштирокчиён бо он шинос шуданд. Иштирокчиёни конфронс доир ба мавзӯъҳои «Созандагони Ватан» — нерӯи нави ҷомеа», «ҲХДТ ва ҷавонони эҷодкор», «Сиёсати давлатии ҷавонон, ҳолат ва пешомадҳо», «Мақоми ҷавондухтарони эҷодкор дар ҷомеа», «Ҷавонон ва технологияи муосир» сухан гуфтанд. Дар ҷараёни конфронс барои иштирокдорон тасвири видеоии чорабиниҳое, ки ташкилоти «Созандагони Ватан» созмон додааст, тақдим гардид. Миёни ҷавонон ва меҳмонон муколама доир гардид ва ҷавонон вобаста ба масоили дахлдори ҳаёти худ ва мушкилоти ҷойдошта ҳарф заданд.