Намоиши техника ва маҳорати оташнишононии ВКД

Душанбе, 30 апрел. (АМИТ «Ховар», Лутфия Эшонқулова).-Дар Сарраёсати хадамоти давлатии оташнишонии Вазорати корҳои дохилӣ намоиши маҳорати касбӣ ва техникаву таҷҳизоти муосири ин хадамоти муҳими давлатӣ баргузор гардид. Ҷараёни намоишро вазири корҳои дохилӣ генерал-лейтенанти милитсия Рамазон Раҳимов бо муовинонаш, ҳайати кормандони вазорат, собиқадорон ва инчунин хонандагони мактабҳои таҳсилоти умумии ноҳияи Синои шаҳри Душанбе назорат намуданд.Тавре ки сомонаи интернетии Вазорати корҳои дохилии ҶT mvd.tj хабар медиҳад, кормандони Хадамоти оташнишонии Вазорати корҳои дохилӣ тозатарин ва пуриқтидортарин техникаву таҷҳизоти замонавиро, ки дар ихтиёр доранд, намоиш дода, бо маҳорату малакаи баланди касбӣ машқҳои душвору мураккаби наҷот додани одамон аз манзилҳои баландошёна, хомӯш намудани сӯхтори маводи сӯзишворӣ, хомӯш намудани сӯхтор бо моеъҳои махсуси кимиёвӣ, бо зинаҳо баромадан ба биноҳои баландошёна ва истифодаи техникаҳои вазнину пуриқтидор дар ҷойҳои душворгузару мушкилро дар сатҳи баланд иҷро намуданд.Вазири корҳои дохилӣ Рамазон Раҳимов ба малакаву касбияти оташнишонон баҳои баланд дода, аз ҷумла қайд намуд, ки ҳамаи ин таҷҳизоти техникаҳои пуриқтидори оташнишонӣ самараи истиқлоли кишвар буда, бо дастгириву мусоидати бевоситаи Сарвари давлат дастрас шудаанд.Вазири корҳои дохилӣ як гурӯҳ кормандони хадамотро бо ҷоизаҳо сарфароз намуд ва дар ин радиф ду нафар хонандагони мактаби таҳсилоти умумии №28-и ноҳияи Синои шаҳри Душанберо, ки барои касби душвору пурифтихори оташнишонӣ аз худ ҳавасу самимият нишон доданд, бо тӯҳфаҳои хотиравӣ қадрдонӣ намуд.