Нашри маҷалла дар бораи вазъи нашъамандӣ дар ҶТ

Душанбе, 5 апрел. (АМИТ «Ховар», Лутфия Эшонқулова). – Маҷаллаи навбатии хулоса дар бораи вазъи нашъамандӣ дар Ҷумҳурии Тоҷикистон тайи соли 2011 аз чоп баромад, ки онро Агентии назорати маводи нашъаовари назди Президенти ҶТ бо дастгирии молиявии Бюрои Созмони амнияту ҳамкории Аврупо (САҲА) дар Тоҷикистон ба чоп тайёр кардааст. Тавре аз Агентии мазкур ба АМИТ «Ховар» хабар доданд, дар маросими муаррифии хулоса, ки 4 апрел дар Агентии назорати маводи нашъаовари назди Президенти ҶТ баргузор гардид, директори Агентӣ Рустам Назаров ва роҳбари раёсати ҳарбию сиёсии САҲА дар Тоҷикистон Алестер Ливингстон ҳозир буданд.Мувофиқи суханони манбаъ, мақсад аз хулосаи ҳарсола додани маълумоти муфассалу асоснок дар бораи вазъи нашъамандӣ дар Тоҷикистон ва натиҷаи фаъолияти мақомоти ҳифзи ҳуқуқи кишвар мебошад. «Маҷалла ба ҳамаи сохторҳои давлатии Тоҷикистон, мақомоти салоҳиятдори кишварҳои ИДМ, ҳамчунин ба сафоратҳо, созмонҳои байналмилалии муқими Ҷумҳурии Тоҷикистон, иттиҳодияҳои ҷамъиятӣ ва васоити ахбори омма фиристода мешавад», — қайд намуд манбаъ.