Омӯзиши усулҳои пайдо намудани радиатсия

Душанбе, 23 апрел. (АМИТ «Ховар», Кристина Эрлих). – 23 апрел дар шаҳри Душанбе машғулияти панҷрӯзаи минтақавӣ барои 36 нафар кормандони хадамоти гумрукӣ ва сарҳадии Тоҷикистону Афғонистон аз рӯи усулҳои пайдо намудани манбаъҳои радиоактивӣ дар сарҳад ба кораш оғоз намуд.Ин тадбир бо ибтикори Агентии оид ба амнияти ядроию радиатсионии Академияи илмҳои Ҷумҳурии Тоҷикистон ва бо дастгирии Агентии байналмилалии оид ба энергияи атом сурат мегирад. Дар маросими оғози машғулияти минтақавӣ директори Агентии оид ба амнияти ядроию радиатсионии академияи илмҳои ҶТ Ӯлмас Мирсаидов, коршиноси бахши амнияти ядроии Агентии байналмилалии оид ба энергетикаи атомӣ Дорел Попеску, ҳамчунин коршиносон ва намояндагони хадамоти гумрукию сарҳадии Ӯзбекистон, Украина ва Молдова иштирок намуданд.