Омодагии пойтахт ба зимистони оянда

Душанбе, 3 апрел.(АМИТ «Ховар», Марзия Саидова).-12 апрели соли 2012 дар шаҳри Душанбе иҷлосияи нуҳуми Маҷлиси вакилони халқи шаҳри Душанбе даъвати чорум баргузор мегардад. Дар ин хусус Маҳмадсаид Убайдуллоев, раиси шаҳри Душанбе қарор ба тасвиб расонд. Интизор меравад, ки дар иҷлосияи шаҳрӣ Насрулло Хайруллоев, муовини аввали раиси шаҳри Душанбе дар бораи натиҷаи фаъолияти сохторҳои муҳандисии ҳаётан муҳими шаҳри Душанбе дар мавсими тирамоҳу зимистони солҳои 2011-2012 ва вазифаҳои таъхирнопазири шаҳрдорӣ доир ба омодагии ҳамаҷониба ба мавсими тирамоҳу зимистони солҳои 2012-2013 ҳисобот медиҳад. Ҳамзамон дар иҷлосияи шаҳрӣ муовини раиси шаҳри Душанбе Ҷамшед Мансуров дар бораи ҷараёни татбиқи Барномаи комплексии рушд ва ҷалби сармояҳо дар истеҳсолоти саноатии шаҳри Душанбе барои солҳои 2011-2015 гузориш медиҳад. Инчунин дар иҷлосия вакилони шаҳр як силсила қарорҳои раиси шаҳрро тасдиқ хоҳанд намуд.