Пӯлод Қодиров соҳиби вазифа шуд

Душанбе, 13 апрел. ( АМИТ «Ховар», Аловиддин Бӯриев).- Собиқ сармураббии дастаи мунтахбаи футболи ҷумҳурӣ Пӯлод Қодиров директори мактаби ҷумҳуриявии маҳорати олии варзишӣ доир ба футбол таъин шуд. Ӯ дар ин вазифа Қосим Қурбоновро иваз кард. Пӯлод Қодиров соли 2006 дастаи наврасони Тоҷикистонро ба гирифтани медалҳои биринҷии чемпионати Осиё, ки дар Сингапур гузаштааст, сарфароз гардонид. Соли 2007 таҳти роҳбарии ӯ наврасони тоҷик дар чемпионати ҷаҳон ширкат карда, то бозиҳои 1/8 ниҳоӣ роҳхат гирифтанд. Аз соли 2008 –ум вазифаи сармураббии дастаи мунтахаби Тоҷикистонро ба дӯш гирифт ва даста зери роҳбарии ӯ барандаи мақоми дуввум дар ҷоми даъвати Конфедератсияи футболи Осиё ва соли 2010 сазовори ҷои сеюм шуд. Моҳи августи соли гузашта барои ҳунарнамоии ғайриқаноатбахши дастаи мунтахаб аз вазифа сабукдӯш шуд.