Парлумон Созишномаи грантиро баррасӣ кард

Душанбе, 16 апрел.(АМИТ «Ховар», Марзия Саидова).-Лоиҳаи қонуни Ҷумҳурии Тоҷикистон «Дар бораи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ» 16 апрел дар ҷаласаи Шӯрои палатаи поёнии парлумони мамлакат таҳти раёсати Шукурҷон Зуҳуров, раиси Маҷлиси намояндагони Маҷлиси Олии ҷумҳурӣ баррасӣ шуд. Аъзои Шӯро ҳамчунин лоиҳаи Қонунҳои Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи барҳамдиҳии ташкилотҳои қарзӣ», «Оид ба ворид намудани илова ба Қонуни Ҷумҳурии Тоҷикистон «Дар бораи низоми иҷозатдиҳӣ», «Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳуҷҷати электронӣ», «Оид ба Кодекси шаҳрсозии Ҷумҳурии Тоҷикистон, «Оид ба ворид намудани тағйиру иловаҳо ба Кодекси замини Ҷумҳурии Тоҷикистон», ба «Кодекси гумруки Ҷумҳурии Тоҷикистон»-ро мавриди муҳокима қарор доданд. Тибқи иттилои Муҳаммадато Султонов, котиби матбуотии Маҷлиси намояндагон дар ҷаласа Созишномаи грантӣ (Амалиёти махсус) байни Ҷумҳурии Тоҷикистон ва Бонки Осиёии Рушд доир ба Лоиҳаи беҳтар намудани роҳи минтақавии автомобилгарди Душанбе – сарҳади Ӯзбекистон баррасӣ гардид.