Тағйирот дар буҷаи пойтахт

Душанбе, 20 апрел.(АМИТ «Ховар», Марзия Саидова).-Дар иҷлосияи нӯҳуми Маҷлиси вакилони халқи шаҳри Душанбе аз ҷониби вакилон ба буҷаи пойтахт барои соли 2012 тағйирот ворид гардид. Дар асоси он буҷаи шаҳри Душанбе аз рӯи даромад ва хароҷот ба маблағи 4 291150 сомонӣ зиёд карда шуд, ки ин маблағ иловатан барои таъмири роҳҳои шаҳр равона карда мешавад. Мавриди зикр аст, ки тадбири мазкур дар доираи «Эълон намудани солҳои 2012-2015 ба сифати солҳои таъмиру бозсозии роҳҳо ва пиёдагардҳои ҳудуди шаҳраку маҳаллаҳо» андешида шудааст. Тибқи иттилои Шавкат Саидов, котиби матбуотии раиси шаҳри Душанбе, масофаи умумии роҳҳои шаҳри Душанбе –хиёбону кӯчаҳо 705, 6 км ва пиёдароҳҳо 329,4 км, дар маҷмӯъ 1035 км ташкил дода, масоҳати умумиашон 18 миллион метри мураббаъ мебошад.