Таҷлили Рӯзи замин дар «Қаратоғ»
Душанбе, 23 апрел. (АМИТ «Ховар», Назир Назиров). – Бо дастгирии Барномаи рушди СММ бахшида ба Рӯзи байналмилалии замин дар хоҷагии ҷангали «Қаратоғ» — и ноҳияи Турсунзода маросими ниҳолшинонӣ баргузор гардид. Кормандони хоҷагии ҷангал ва шикори назди Кумитаи ҳифзи муҳити зисти назди Ҳукумати ҶТ дар масоҳати 1,5 гектар 500 ниҳоли санавбар, шафтолу, гелос, олуболу ва чормағз шинониданд. Тавре дар мудирияти хоҷагии ҷангал ва шикори назди Кумитаи ҳифзи муҳити зисти назди Ҳукумати ҶТ зикр намуданд, Ҳукумати Тоҷикистон ба ҳифзи табиат ва истифодаи самарабахши сарватҳои табиӣ таваҷҷӯҳи хоса медиҳад.