Тадбирҳои нави шаҳрдорӣ

Душанбе, 3 апрел.(АМИТ «Ховар», Марзия Саидова).-Дар ҷаласаи кории шаҳрдорӣ раиси шаҳри Душанбе Маҳмадсаид Убайдуллоев зимни дахли масоили хоҷагидории пойтахт бо хулоса аз натиҷаҳои зимистонгузаронӣ, инчунин эҳтимолияти боронҳои баҳорӣ ва омодагиҳо ба рафъи пайомадҳои табиӣ дастур дод, ки ситодҳои дахлдори ҳолатҳои фавқулодда дар сатҳи шаҳру ноҳияҳои пойтахт ва дигар субъектҳои хоҷагидорӣ зери масъулияти роҳбарони аввали муассисаву идораҳо фаъолияти худро бо ҷалби техникаи лозимӣ ва ҳамоҳангӣ бо сохторҳои марбута тавсеа бахшанд. Вобаста ба масъалаи мазкур таваҷҷӯҳи раисони ноҳияҳои шаҳр ва роҳбарони дигар субъектҳои масъули соҳавӣ ба ҳолати тозагӣ ва коршоямии каналу селпартоҳои марзгузари шаҳр ҷалб гардид ва супориш дода шуд, ки дар ин самт баҳри пешгирии оқибатҳои номатлуби селборишҳо фаъолияташонро пурзӯр намоянд.Ҳамзамон раиси шаҳр ба масъулини идораҳои марбута супориш дод, ки барои харидории техникаҳои хурди коммуналии тозакунандаи пиёдаравҳо бо анҷоми пажӯҳиши дақиқ унвонии раиси шаҳри Душанбе пешниҳод ирсол созанд.Тибқи иттилои Шавкат Саидов, котиби матбуотии раиси шаҳри Душанбе дар ҷаласа ҳамчунин масъалаи ғановати бозори истеъмолии шаҳр, ҷамъоварии андоз, истифодаи мақсадноки маблағҳои буҷавӣ, таъмири роҳҳои пойтахт ва дигар масъалаҳои марбут ба рушди бахши иҷтимоии пойтахт баррасӣ шуданд.