Тасдиқи Барномаи байнидавлатии ЕврАзЭС оид ба безараргардони партовгоҳҳо
Душанбе, 9 апрел. (АМИТ «Ховар», Дилшодаи Хайруллоҳ).- Шӯрои байнидавлатии Иттиҳоди иқтисодии Авруосиё (ЕврАзЭС) Барномаи безараргардонии заминҳои аз истеҳсолоти уран таъсирдидаро тасдиқ намуд. Аз ҷониби Ҷумҳурии Тоҷикистон ин ҳуҷҷатро Сарвазири мамлакат Оқил Оқилов имзо намуд. Татбиқи Барнома дар солҳои 2013-2018 ба нақша гирифта шуда, ҳаҷми умумии маблағгузории он 1 миллиарду 156 миллион рубли русиро ташкил медиҳад, аз ҷумла ҳиссаи ҷониби Русия 75 фоизи маблағи номбаршуда, Қазоқистон — 15 фоиз, Тоҷикистон ва Қирғизистон -мутаносибан панҷ фоизӣ. Тавре ки маълум аст, ҳанӯз аз давраи Иттиҳоди Шӯравӣ дар қаламрави Тоҷикистон дар мавзеи Табошар ва Кирғизистон – Хоҷӣ Сой ва Туюк-Су партовгоҳҳои истеҳсолоти ғанигардонии уран боқӣ мондаанд. Ин иншоот на танҳо метавонанд ба саломатии мардум зарар расонанд, балки сарчашмаи хатарноки экологии минтақа низ ба шумор мераванд. Аз ин ҷиҳат Барномаи мазкур имкон медиҳад, ки бо гузаронидани рекултиватсияи ин заминҳо хатари пайдоиши ҳолатҳои фавқулодда вобаста ба вазъи радиоэкологӣ камтар гардад. Тибқи Барнома барои корҳои безараргардонӣ 548 миллион рубли русӣ ба Ҷумҳурии Тоҷикистон ва 499 миллион рубл барои Ҷумҳурии Қирғизистон пешбинӣ мешавад. Инчунин қисми маблағ барои таҳияи системаи таъмини бехатарии радиатсионӣ, ҳуҷҷатҳои меъёрӣ ва идораи Барнома равона мегардад. Фармоишгар-ҳамоҳангсози Барнома корпоратсияи давлатии энергияи атомии «Росатом» муайян гардидааст. Аз ҷониби Тоҷикистон ҳамчун фармоишгар Вазорати энергетика ва саноат баромад мекунад. Дар ин бора ба мухбири АМИТ «Ховар» муовини роҳбари департаменти сиёсати савдои котиботи ЕврАзЭС Абдулазиз Шарифов иттилоъ дод.