«Тоҷикхориҷакор» ба кораш шурӯъ намуд

Душанбе, 24 апрел. (АМИТ «Ховар», Лутфия Эшонқулова). – Корхонаи воҳиди давлатии «Тоҷикхориҷакор» — и Хадамоти муҳоҷирати назди Ҳукумати ҶТ дар Федератсияи Русия расман ба фаъолияташ шурӯъ намуд. Тавре, ки аз дафтари матбуоти Намояндагии Муҳоҷирати меҳнатии назди Ҳукумати ҶТ ба АМИТ «Ховар» хабар доданд, 20 апрел дар шаҳри Санкт – Петербург маросими ифтитоҳи намояндагии мазкур сурат гирифт. Рустам Олимов ва Соҷида Ибодова шахсони масъули намояндагӣ дар Маскав ва Санкт — Петербург таъин шуданд. Дар ҷараёни маросим ба манзури зудтар ҳал намудани вазифаҳои ташкилӣ барои таъсиси бунёди бимаи иҷтимоӣ, бунёди нафақа, тарҳрезии мансабҳо, дастурҳо барои ҳайати шахсӣ ва ғайра супоришҳо дода шуданд. Ҳамчунин вазифаҳои аввалиндараҷа ҷиҳати барқарор намудани равобит бо корфармоёни минтақа мавриди муҳокима қарор гирифтанд.Мақсад аз таъсиси «Тоҷикхориҷакор» пешниҳоди иттилоот дар бораи ҷойҳои холии кор, расонидани кӯмак ва додани маслиҳат ҷиҳати ба расмият даровардани ҳуҷҷатҳои шаҳрвандони Ҷумҳурии Тоҷикистон, таъмини шаҳрвандони Ҷумҳурии Тоҷикистон бо ҷойҳои кор дар хориҷа, ҳифзи ҳуқуқу манфиатҳои онҳо дар давраи муҳоҷирати меҳнатӣ ва ғайра мебошад.