«TOJEXPO» дар Душанбе «Баҳор- 2012»-ро мегузаронад

Душанбе, 17 апрел.(АМИТ «Ховар», Марзия Саидова).-Муддати се рӯз- аз 26 то 29 апрели соли равон дар «Кохи Борбад»-и Душанбе намоишгоҳи байналмилалии саноат ва тиҷорати Тоҷикистон «Баҳор- 2012» баргузор мегардад. Чорабинӣ бо дастгирии расмии Ҳукумати Ҷумҳурии Тоҷикистон ва иқдоми Палатаи савдо ва саноати ҷумҳурӣ ва ҶДММ «ТOJ EXPO» созмон дода шуда, ҳадафаш муаррифии молу маҳсулоти мухталифи саноатӣ, рушди иқтисодиёти кишвар,тавсеаи робитаҳои иқтисодию тиҷоратӣ байни кишварҳои ҷаҳон ва ҷалби сармоя ба кишвар аст. Маъруф Ҳамроев, корманди масъули ширкати «ТOJEXPO» дар сӯҳбат ба хабарнигори АМИТ «Ховар» гуфт, ки дар намоишгоҳ намояндагони беш аз 10 кишвари ҷаҳон, назири Русия, Чин, Эрон, Туркия, Гурҷистон, Украина, Беларус, Қазоқистон, Қирғизистон ва Ӯзбекистон ширкат намуда, молу маҳсулоти худро ба маърази тамошо мегузоранд. Намоишгоҳи байналмилалии саноат ва тиҷорати Тоҷикистон «Баҳор 2012» аз бахшҳои гуногун- сохтмон, энергетика, кишоварзӣ, хӯрокворӣ, тандурустӣ ва атриёт, мебел ва ороишот иборат мебошад. «TOJEXPO» ширкати намоишгоҳӣ буда, соли равон таъсис дода шудааст ва ният дорад, ки соле ду маротиба дар ҷумҳурӣ намоишгоҳҳои байналмилалии саноатию тиҷоратиро ҷиҳати рушди иқтисодиёти кишвар созмон диҳад.