Варзишгарони 20 давлат ба Душанбе меоянд

Душанбе, 11 апрел.(АМИТ «Ховар», Марзия Саидова).- Ба ифтихори Рӯзи пойтахт бори нахуст дар Тоҷикистон аз 27 то 29 апрели соли 2012 таҳти сарпарастии шаҳрдории Душанбе чемпионати 6-уми Осиё доир ба таэквон-до бо иштироки 300 нафар таэквандочӣ (ИТФ) доир мегардад. Макони баргузории чорабинии байналмилалӣ Маҷмааи варзишии Кумитаи андози назди Ҳукумати Ҷумҳурии Тоҷикистон буда, дар он беҳтарин дастаҳои таэквандочии 20 кишвари Осиё, назири Тоҷикистон, Русия, Чин, Эрон, Афғонистон, Озарбойҷон, Ҳиндустон, Непал, Ҷопон, Аморати Муттаҳидаи Араб, Муғулистон, Индонезия, Куриёи Шимолӣ, Куриёи Ҷанубӣ, Ӯзбекистон, Қазоқистон, Қирғизистон ва Туркманистон иштирок менамоянд. Назар ба иттилои Шавкат Саидов- котиби матбуотии раиси шаҳри Душанбе ҳадаф аз баргузории чемпионати 6-уми Осиё дар Душанбе рушди варзиш, оммавият ва тарғиби варзиши таэквандо (ИТФ) буда, он дар таҳкими дӯстӣ ва муносиботи судманди кишварҳои осиёӣ, бахусус шаҳрҳое, ки бо Душанбе бародаршаҳранд, нақши арзишманд хоҳад гузошт. Мавриди зикр аст, ки ҳамасола Рӯзи пойтахт шанбеи сеюми моҳи апрел бо ташкил ва баргузории чорабиниҳои гуногуни фарҳангию варзишӣ бо иштироки намояндагони шаҳрҳои бародаршаҳри Душанбе ва аҳли пойтахт таҷлил мегардад.