Вохӯрӣ бо коргардони амрикоӣ

Душанбе, 26 апрел. (АМИТ «Ховар», Пайрав Назаров ). – 27 апрел дар Хонаи кино (воқеъ дар кинотеатри Зебунисо) бо коргардони амрикоӣ хонум Элизабет Ҷеймс Ҳавиланд вохӯрӣ баргузор мегардад. Ин чорабинӣ бо ибтикори шӯъбаи равобит бо аҳли ҷамъияти Сафорати ИМА дар ҶТ ва бо мадади Хонаи кино сурат гирифта, зимни он филми «Таърихи муҳаббат» намоиш дода мешавад. Коргардони бахши филмҳои мустанад Элизабет Ҷеймс Ҳавиланд, ки дорои якчанд мукофот мебошад, дар шаҳри Дареми иёлати Каролинаи Шимолии Амрико кор мекунад. Номбурда продюсер ва мушовири филми «Қосид Лавиния» мебошад, ки моҳи сентябри соли 2011 намоиш дода шуда буд. Элизабет дар баробари фаъолияташ ба ҳайси коргардон дар Маркази Донишгоҳи Дюк аз назарияи офаридани филмҳои мустанад дарс медиҳад. Дар ин бора аз Сафорати ИМА дар Тоҷикистон ба АМИТ «Ховар» хабар доданд.