Вохӯрии роҳбарияти Хатлон бо донишҷӯён

Қӯрғонтеппа, 26 апрел. (АМИТ «Ховар», Мурод Сотиев). – Имрӯз, 26 апрел, дар толори Филармонияи давлатии Тоҷикистон вохӯрии роҳбарияти вилояти Хатлон бо донишҷӯёни донишкадаҳои олии пойтахт, ки барандаи квотаи Сарвари Давлат мебошанд, баргузор мегардад. Қобили зикр аст, ки чунин вохӯриҳо ҳар сол сурат гирифта ва дар ҷараёни онҳо масъалаҳои марбут ба донишҷӯён мавриди муҳокима қарор мегиранд. Алҳол донишҷӯёни квотадори вилояти Хатлон дар 13 донишкадаи олии пойтахт, ҳамчунин дар донишгоҳҳои шаҳрҳои Қӯрғонтеппа ва Кӯлоб таҳсил мекунанд. Тавре аз шӯъбаи иттилооту таҳлили маъмурияти вилояти Хатлон ба АМИТ «Ховар» хабар доданд, чунин вохӯриҳо тайи 2 рӯзи оянда дар шаҳрҳои Қӯрғонтеппа ва Кӯлоб низ баргузор мешаванд.