«Як ҳафтаи фараҳбахш»
Душанбе, 3 апрел. (АМИТ «Ховар», Фирӯза Давлатова ).- Аз 2 то 9 апрели соли равон дар маъмурияти Китобхонаи давлатии бачагонаи ҷумҳуриявии ба номи Мирсаид Миршакар Фестивали миллии «Ҳафтаи китоби кӯдакону наврасони Тоҷикистон» ва намоиши китобӣ таҳти унвони «Як ҳафтаи фараҳбахш» баргузор мегардад. Дар фестивал намоиши дастранҷи кӯдакону наврасон, намоиш ва фурӯши китобу рӯзнома ва маҷаллаҳои тозанашр, сӯҳбати наврасон бо адибон, қироати порчаҳо аз ашъори адибон ва саҳнаҳои театрикунонидашуда доир ба Наврӯз бо иштироки толибилмони болаёқат намоиш дода мешавад. Мавриди зикр аст, ки оғозу ҷамъбаст ва рӯзҳои дигари Фестивали ҷумҳуриявии «Ҳафтаи китоби кӯдакон ва наврасони Тоҷикистон» дар шаҳру ноҳияҳои ҷумҳурӣ тибқи нақшаи китобхонаҳо баргузор мегардад.