Якуми май — иди баҳор ва меҳнат

Душанбе, 30 апрел. (АМИТ «Ховар», Кристина Эрлих). – Дар бисёр кишварҳои ҷаҳон, аз ҷумла дар Тоҷикистон 1 май ҳамчун Рӯзи байналмилалии якдилии меҳнаткашон ё иди баҳору меҳнат таҷлил карда мешавад.1 май дар Тоҷикистон рӯзи истироҳат аст. Чун 1 май ба рӯзи муқаррарии корӣ ва маҳз ба рӯзи сешанбе рост меояд, мувофиқи Қонуни ҶТ «Дар бораи рӯзҳои ид» ин рӯз ба вақти дигар гузаронида намешавад ва мардуми Тоҷикистон як рӯз истироҳат мекунанд. Дар ин бора мудири шӯъбаи ҳуқуқи Федератсияи иттифоқҳои касабаи мустақили Тоҷикистон Исмоил Файзиев ба мухбири АМИТ «Ховар» хабар дод. Қобили зикр аст, ки якуми май ё унвонҳои дигар, аз қабили Рӯзи меҳнат, Рӯзи баҳор, Иди Баҳор ва меҳнат, Рӯзи байналмилалии якдилии меҳнаткашон дар 142 кишвару ҳудудҳои ҷаҳон 1 май ё дар рӯзи душанбеи аввали моҳи май таҷлил карда мешавад.