Ҷаласа дар Вазорати молия
Душанбе, 28 май. (АМИТ «Ховар», Покиза Маҳмадбекова). – Дар Вазорати молияи Ҷумҳурии Тоҷикистон ҷаласаи гурӯҳи корӣ оид ба ҳалли масъалаи ихтисор намудани кормандони мақомоти идораи давлатӣ баргузор гардид. Тавре аз Вазорати молияи ҷумҳурӣ ба АМИТ «Ховар» хабар доданд, гурӯҳи корӣ ба манзури иҷрои банди 7 нақша – тадбирҳо ҷиҳати иҷрои вазифаҳое, ки аз Паёми Президенти кишвар ба Парлумони Ҷумҳурии Тоҷикистон аз 20 апрели соли 2012 бармеоянд, таъсис ёфта буд.Дар ҷаласа роҳбари гурӯҳи корӣ вазири молияи ҶТ Сафаралӣ Наҷмиддинов аъзои гурӯҳи кориро бо вазифаашон ошно намуда, имконияту аҳамияти фаъолияти гурӯҳи кориро иброз дошта ва нақшаи кориро манзури иштирокдорони ҷаласа намуд. Аъзои гурӯҳи корӣ дар муҳокимаи масъалаи ихтисор намудани кормандони мақомоти идораи давлатии вазорату идораҳои мамлакат фаъолона иштирок намуда, фикру пешниҳодҳояшонро баён карданд.Вазири молияи кишвар натиҷаи ҷаласаро ҷамъбаст карда, аъзои гурӯҳи кориро даъват намуд, ки ҳамаи тадбирҳои ба нақша гирифташударо ба манзури ҳалли судбахши вазифаҳои ба миён гузошташуда сари вақт ва хушсифат иҷро кунанд.