Ҷаласаи комиссияи муштараки байниҳукуматӣ дар ҶИЭ
Душанбе, 31 май. (АМИТ «Ховар», Дилшодаи Хайруллоҳ).- 26-29 майи соли равон дар шаҳри Теҳрони Ҷумҳурии Исломии Эрон ҷаласаи нӯҳуми Комиссияи муштараки байниҳукуматии Тоҷикистону Ҷумҳурии Исломии Эрон доир ба ҳамкориҳои тиҷоратӣ, иқтисодӣ, техникӣ ва фарҳангӣ баргузор гардид.Ҳайати тоҷикистонии комиссияро вазири энергетика ва саноати Ҷумҳурии Тоҷикистон Гул Шералӣ ва ҳайати қисми эронии комиссияи мазкурро вазири нерӯи Ҷумҳурии Исломии Эрон — Маҷиди Номҷӯ роҳбарӣ намуданд. Зимни шурӯи ҷаласа ҳамраиси қисмати тоҷикистонии комиссия вазири энергетика ва саноати Ҷумҳурии Тоҷикистон Гул Шералӣ вобаста ба масъалаҳои ҳамкориҳои дуҷониба, вазъи кунунии рушди муносибатҳои ҳар ду кишвари ба ҳам дӯсту бародар дар соҳаҳои гуногун, густариши мунтазами муносибатҳои иқтисодӣ , ба роҳ мондани самтҳои афзалиятноки ҳамкориҳо миёни Ҷумҳурии Тоҷикистон ва Ҷумҳурии Исломии Эрон дар бахшҳои гуногун ибрози андеша намуд. Ҳамраиси қисмати эронии комиссияи мазкур, вазири нерӯи Ҷумҳурии Исломии Эрон — Маҷиди Номҷӯ бо пазироӣ аз ҳайати Тоҷикистон аз равобити дӯстонаи ду кишвар, тавсеа ва густариши муносибатҳои дуҷониба изҳори қаноатмандӣ намуда, талошварзиҳои минбаъдаро дар ин ҷода таъкид намуд.Дар ҷаласаи 9-уми комиссия самтҳои гуногуни ҳамкорӣ , аз ҷумла тиҷоратию иқтисодӣ , энергетика ва саноат, ҳамлу нақл, тандурустӣ , молия, маориф, фарҳанг, илм, таҳқиқот ва технология мавриди баррасии тарафҳо қарор гирифтанд. 29 -уми майи соли 2012 Протоколи ҷаласаи нӯҳуми комиссияи муштараки байниҳукуматии Тоҷикистону Эрон доир ба ҳамкориҳои тиҷоратӣ , иқтисодӣ, техникӣ ва фарҳангӣ дар ҳузури намояндагони ҳар ду тараф ба имзо расид.