Ҷашни кӯдакон дар «Боғи кӯдакон»

Душанбе, 30 май. (АМИТ «Ховар», Дилшодаи Хайруллоҳ).- 1-уми июни соли равон дар «Боғи кӯдакон»-и пойтахт бо иштироки зиёда аз 2000 нафар кӯдаку наврас чорабинии идона бахшида ба Рӯзи байналмилалии ҳифзи кӯдакон баргузор мегардад. Дар чорабинӣ намоиши ҳунару эҷоди кӯдакон, консерти истеъдодҳои наврас, озмуну викторинаҳо ва мусобиқаҳои варзишӣ ташкил ва гузаронида мешаванд. Дар доираи чорабинии мазкур инчунин баргузории туйи суннатии 30 нафар кӯдак аз оилаҳои ниёзманд дар назар аст. Ёдовар мешавем, ки чорабинӣ бо ташаббуси Муассисаи давлатии Маркази кӯдакон ва наврасони шаҳри Душанбе баргузор мешавад.