Ӯрдугоҳҳои мактабиён меафзоянд
Душанбе, 18 май. (АМИТ «Ховар», Людмила Дубинина). – Дар асоси Қарори Ҳукумати Ҷумҳурии Тоҷикистон аз 3 декабри соли 2011 «Дар бораи ташкили истироҳати тобистонаи кӯдакону наврасон дар соли 2012» дар назди Федератсияи иттифоқҳои касабаи мустақили Тоҷикистон ситоди «Тобистони соли 2012» таъсис ёфт, ки ба он роҳбарони кумитаҳои соҳавии ҷумҳуриявӣ ва кормандони масъули Федератсия шомиланд. Тавре мудири шӯъбаи кори фарҳангию оммавӣ ва сиёсати байни ҷавонони Федератсияи иттифоқҳои касабаи мустақили Ҷумҳурии Тоҷикистон Саъдӣ Машидов ба АМИТ «Ховар» хабар дод, мувофиқи маълумоти пешакӣ, соли ҷорӣ дар ҷумҳурӣ қариб 4 ҳазор ӯрдугоҳҳои наздимактабӣ, беруназшаҳрии меҳнату истироҳат, ва ӯрдугоҳҳои варзишию тансиҳатӣ барои хонандагони синфҳои болоӣ ташкил карда мешаванд. Дар ӯрдугоҳҳо кӯдакону наврасон метавонанд, дар ду – се баст ва дар баъзеи онҳо дар чор баст истироҳат кунанд.Тобистони соли равон дар ӯрдугоҳҳо қариб 350 ҳазор нафар кӯдакону наврасони кишвар истироҳат хоҳанд кард. Бо назардошти баландшавии нархи маводи ғизоӣ, пардохти пули сафар ва хизматрасонии коммуналӣ арзиши як роҳхат қариб 500 сомониро ташкил медиҳад. Соли гузашта арзиши як роҳхат ба ӯрдугоҳи иттифоқҳои касаба баробари 440 сомонӣ буд. Пардохти волидайн аз 15 то 20 фоизи арзиши роҳхатро ташкил медиҳад.