600 кг маводи нашъадор нобуд карда шуд

Душанбе, 16 май. (АМИТ «Ховар», Лутфия Эшонқулова).-Имрӯз, 16 май дар тафдонҳои заводи «Тоҷиктекстилмаш»-и шаҳри Душанбе, бо иштироки роҳбарияти Раёсати тафтишотӣ, Раёсати амнияти дохилии ВКД, намояндагони мақомоти прокуратура, суд ва намояндагони воситаҳои ахбори омма 600 кг маводи нашъадор сӯзонида шуд. Аз ин миқдор 94 кг героин, 32 кг афюн, 477 кг бангдона, 1929 адад ҳаб, яъне таблетка аз рӯи 157 парвандаи ҷиноӣ, ки нисбаташон ҳукми суд баромадааст, маҳв карда шуд. Ёдрас менамоем, ки вобаста ба ин 200 нафар шаҳрванд бо ҷурми фурӯши ғайриқонунии маводи нашъадор тибқи моддаи 200-и Кодекси ҷиноятии Ҷумҳурии Тоҷикистон айбдор дониста ва равонаи зиндон шудаанд.Дар ин бора ба АМИТ «Ховар» аз маркази матбуоти Вазорати корҳои дохилии ҶТ хабар доданд.