Анҷумани якуми косибони Тоҷикистон

Душанбе, 31 май. (АМИТ «Ховар», Людмила Дубинина ). – Бо ибтикори ширкати CESVI — и Итолиё ва Ассосиатсияи миллии тиҷорати хурду миёнаи Ҷумҳурии Тоҷикистон дар шаҳри Душанбе анҷумани якуми косибони Тоҷикистон баргузор гардид.Дар кори анҷуман косибони минтақаҳои Тоҷикистон, гурӯҳи кории Иттифоқи косибони ҷумҳурӣ, намояндагони вазорату идораҳо, созмонҳои байналмилалӣ ва коршиносони бахши косибӣ ширкат доштанд.Масъалаҳои асосии рӯзномаи анҷуман иборат аз воқиф намудани иштирокдорони он аз тадбирҳои Иттифоқи косибони Тоҷикистон, муҳокимаи Оиннома ва ҳуҷҷатҳои дигари Иттифоқ, интихоби роҳбарон ва аъзои раёсати Иттифоқ, муайян намудани шартҳои воридшавӣ ба аъзогии Иттифоқ ва ғайра буданд.Дар анҷуман роҳбари лоиҳаи CESVI Давид Коста ва раиси Раёсати иттифоқи косибони Тоҷикистон Матлуба Ӯлҷабоева сухан карданд.Ҳамчунин мушовири бахши косибӣ Н. Здравкова аз хусуси проблемаҳои мавҷудаи косибон нақл намуд. Мувофиқи суханони ӯ, дар Тоҷикистон ба манзури ривоҷ додани бахши косибӣ лоиҳаи махсус арзи вуҷуд дорад. Бо ин мақсад дар ҷумҳурӣ барои баланд бардоштани сифати маҳсулоти косибон тренингҳои мухталиф роҳандозӣ шудаанд. Ҷиҳати ба бозори ҷаҳон баровардани маҳсулоти косибони Тоҷикистон дар оянда аз Олмон мутахассисони бахши маркетинги маҳсулот ва фурӯши он даъват карда мешаванд.