Баррасии рушди таҳсилоти фарогир дар вилояти Хатлон

Душанбе, 29 май. (АМИТ «Ховар», Музаффар Рустамов).-31 майи соли 2012 бо дастгирии барномаҳои таҳсилотӣ ва барномаҳои «Тандурустии ҷамъиятӣ»-и Институти «Ҷамъияти Кушода» — Бунёди Мадад дар Тоҷикистон дар ҳамкорӣ бо Раёсати маорифи вилояти Хатлон ва ташкилоти олмонии CARITAS дар шаҳри Қӯрғонтеппа мизи мудаввар дар мавзӯи «Иқдоми аввалини рушди таҳсилоти фарогир дар вилояти Хатлон: пмушкилот ва дурнамо» баргузор мегардад. Ҳадаф аз чорабинии мазкур баланд бардоштани огоҳии бахшҳои давлативу ғайридавлатӣ ва академӣ доир ба масоили фарогир ва нақши ташкилотҳои давлативу ғайридавлатӣ дар пешбурди сиёсати таҳсилоти фарогир мебошад. Дар ҷараёни мизи мудаввар имкониятҳои воқеии рушди таҳсилоти фарогир дар вилояти Хатлон, таъмини дастрасӣ ба муассисаҳои таҳсилотӣ, хизматрасонии ҷамъиятӣ, дастрасии равониву тиббӣ ва педагогӣ барои кӯдакони имконияташон маҳдуд тавассути омода кардани муаллимону мутахассисон, таҳияи заминаи методӣ ва афзун кардани огоҳии аҳолӣ дар ин масъала баррасӣ мешаванд.Ба мизи мудаввар 40 нафар намояндаи мақомоти худидораи маҳаллӣ, ТҒД-ҳои маҳаллӣ, шӯъбаҳои ноҳиявии маориф ва идораи маорифи вилояти Хатлон, донишгоҳҳои давлатии Кӯлоб ва Қӯрғонтеппа, маркази захиравии назди Донишгоҳи давлатии омӯзгории Тоҷикистон ва шӯрои коршиносони департаменти таҳсилоти ИҶК-БМТ даъват шудаанд.