Бетаъсирии сӯзишворӣ дар воридоти мошин

Душанбе, 2 май. (АМИТ «Ховар», Лаззат Диловарзод).- Бино ба маълумоти омори расмӣ, вазъи иқтисодии ҶТ сол то сол беҳтар мегардад. Дар давоми 5 соли охир ба ҷумҳурӣ беш аз 70 ҳазор мошинҳои сабукрав ва боркаш ворид карда шудааст, ки ҳар кадом аз 5 то 350 -500 ҳазор доллари амрикоӣ қимат доранд. Танҳо дар се моҳи аввали соли 2012 ба ҷумҳурӣ ба маблағи 98,9 млн. доллар мошинҳои сабукрав ворид шудааст, ки далели пешрафти иқтисоди кишвар аст.Тибқи маълумоти оморӣ дар соли 2011 ба Ҷумҳурии Тоҷикистон аз хориҷи кишвар ба маблағи 146,6 млн. доллар мошинҳои сабукрав ворид гардидааст.Ба гуфти иқтисодшинос Л. Обидов, бо вуҷуди афзоиши қимати сӯзишворӣ, дар ҷумҳурӣ талаботи аҳолӣ ба мошин бештар мегардад. Дар маркази шаҳрҳои калонтарини ҷумҳурӣ, аз ҷумла дар пойтахти кишвар — шаҳри Душанбе аз сабаби зиёд будани мошин дар роҳҳои автомобилгард танба ба вуҷуд омада, ҳаракати мошинҳо соатҳо қатъ мегардад.