Бонуи соҳибкори сол

Душанбе, 28 май. (АМИТ «Ховар», Лаззат Диловарзод).- Аз «Ассотсиатсияи миллии занони соҳибкори Тоҷикистон» ба мухбири АМИТ «Ховар» иттилоъ доданд, ки бо мақсади эътироф кардан ва мукофотонидани бонувони фаъоли соҳибкори Тоҷикистон ва ҷалби рушди соҳибкорӣ миёни онҳо дар ҷумҳурӣ Озмуни миллии «Бонуи соҳибкори сол – Фараҳ -2012» эълон гардидааст.Ба иттилои манбаъ, ҳар як бонуи фаъолияти иқтисодӣ дошта, ки кораш ба меъёрҳои озмун мувофиқат менамояд, дар яке аз 6 номгӯи озмун: соҳаи хизматрасонӣ, истеҳсолот ва хӯроки умумӣ, соҳаи хизматрасонии тиббӣ ва таълимӣ, соҳаи кишоварзӣ, соҳаи зебоӣ, мӯд, дизайн ва соҳаи ҳунармандӣ ширкат варзида метавонад.Ғолиби озмун соҳиби ҷоизаи асосӣ — 100 ҳазор сомонӣ мегардад, ки он ба рушди соҳибкории ӯ бештар мусоидат хоҳад кард.