Боздошти қаллобони дипломҳои қалбакӣ

Душанбе, 28 май. (АМИТ «Ховар», Бекназари Абӯбакр). — Як гурӯҳи муташаккили ҷиноӣ, ки тайи чандин соли охир ба сохтан ва фурӯхтани дипломҳои қалбакии донишгоҳу донишкадаҳои Ҷумҳурии Тоҷикистон машғул буд, ошкор ва боздошт гардид.Аз маркази робитаҳои ҷамъиятии Кумитаи давлатии амнияти миллии Ҷумҳурии Тоҷикистон ба мухбири АМИТ «Ховар» иттилоъ доданд, ки гурӯҳ аз 5 нафар иборат буда, 2 нафараш зан аст. Аз ҷумла, сокинони шаҳри Душанбе Сафар Раҷабови 63-сола, Ғиёсиддин Очилови 46- сола, Муҳаббат Сувонқуловаи 39-сола, Людмила Дрозденкои 44- сола ва сокини шаҳри Турсунзода Толиб Очилдиеви 39- сола шомили ин гурӯҳ будаанд. Гурӯҳ аз соли 1990 то имрӯз зиёда аз 100 дипломи қалбакӣ сохта, ба шаҳрвандони Тоҷикистон, Ӯзбекистон, Русия ва Эрону Афғонистон бо арзиши аз 150 сомонӣ то 300-800 доллари ИМА фурӯхтааст.Ҳангоми ошкор ва боздошти ин гурӯҳи муташаккили ҷиноӣ ҳамчун далел аз ҳуҷраҳои эшон таҷҳизоти техникӣ, аз қабили компютер, принтери ранга, муқова (корочка)-и дипломҳои қалбакӣ ва амсоли инҳо ёфт ва мусодира шудааст.
Мавриди зикр аст, ки аз рӯи ин ҳодиса парвандаи ҷиноӣ боз шуда, тафтишот идома дорад.