Дар АБ ИДМ қонунҳои моделӣ қабул гардид

Душанбе, 17 май.(АМИТ «Ховар», Марзия Саидова).-Ҳайати парлумонии Тоҷикистон таҳти роҳбарии раиси Маҷлиси миллии Маҷлиси Олии ҷумҳурӣ дар ҷаласаи пленарии 37-уми Ассамблеяи байнипарлумонии давлатҳои Иттиҳоди Давлатҳои Мустақил /ИДМ/, ки 17 май дар қасри Таврическийи Санкт-Петербург доир гардид, ширкат намуд. Дар кори Ассамблея ҳайати парлумонии ҷумҳуриҳои Арманистон, Беларус, Озарбойҷон, Қазоқистон, Қирғизистон, Молдова, Русия, Тоҷикистон, Украина, инчунин Маҷлиси парлумонии Иттиҳоди Беларус ва Русия, Суди иқтисодии ИДМ ва дигар созмонҳои байнипарлумонию Конфедератсияи сартосарии иттифоқҳои касаба иштирок намуданд, иттилоъ дод Шавкат Саидов, ёвари раиси Маҷлиси миллӣ. Дар ҷаласаи 37-уми Ассамблеяи байнипарлумонии кишварҳои ИДМ дар қатори дигар масъалаҳо, инчунин қонунҳои моделӣ ва санадҳое, ки дорои хусусияти тавсиявӣ дар таҳияи қонунҳои миллии кишварҳои аъзои ин созмони бонуфузанд, қабул гардиданд. Ин қонунҳо «Дар бораи ҳуқуқи соҳибмулкӣ ва ҳимояи он», «Дар бораи моликияти зеҳнӣ» ва консепсияи муҳоҷирати умумӣ дар миқёси ИДМ мебошанд.